Ex Processu Informativo anni 1757

Christi nomine invocato. Pro Tribunali sedentes, et solum Deum prae oculis habentes per hanc nostram definitivam sententiam, quam de juris Peritorum consilio in his scriptis ferimus in Causa Canonizazionis Beati Gregorii de Verucchio de, et super cultu publico a tempore immemorabili, et a pluribus saeculis praestito eidem, et super casu excepto a Decretis san. mem. Urbani VIII, in Congregatione Sanctissimae Inquisitionis editis, rebusque aliis etc. inter admodum R. Patrem Magistrum ex Provincialem Amedeum Masi Procuratorem Causae specialiter constitutum a Rev.mo Patre Magistro Francisco Xaverio Vasquez totius Ordinis Eremitarum S. Augustini Generali actorem ex una, et adm. Excellentem Dominum Franciscum Zavagli juris utriusque Doctorem Promotorem Fidei specialiter deputatum Reum, seu verius pro Fisco, et Sanctae Sedis partes agentem Partibus ex altera: visis iisdem Decretis san. mem. Urbani VIII, et aliis novissimis Sacrae Congregationis Rituum, visisque monumentis manuscriptis productis et compulsatis, visis documentis, caeterisque aliis juribus, visis depositionibus Testium, ac demum visis, omnibus in Processu contentis, visisque videndis, et consideratis considerandis. Christi nomine repetito, dicimus, pronunciamus, decernimus, declaramus, et definitive sententiamus, constitisse et constare, publicum cultum a tempore immemorabili, et a centum et multo pluribus annis ante promulgationem dictorum Decretorum san. mem. Urbani VIII, fuisse praestitum et exhibitum, ac etiam in praesens praestari eidem Beato Gregorio de Verucchio, dictumque cultum fuisse et esse publicum, patentem et notorium. Causamque praeterea hujusmodi versari, et esse inter casus exceptos a dictis Decretis Urbani VIII, prout Causam hujusmodi de facto esse, et versari in casu excepto declaramus, et proinde nullatenus contraventum, sed sufficienter fuisse, et esse paritum eisdem Decretis; et ita dicimus, pronunciamus, decernimus, declaramus, et difinitive sententiamus, non solum praemisso, sed et omni alio meliori modo.

Ita pronunciavi. Ego Franciscus Maria Canonicus Pasini Vicarius Generalis Capitularis, et Judex.

Lata et lecta fuit praesens sententia per dictum Ill.mum D. juris utriusque Doctorem Canonicum Franciscum Mariam Pasini Vicarium Generalem Capitularem Arimini Judicem pro tribunali sedentem in Ecclesia S. Jacobi hujus Civitatis, et praecipue ante Altare ejusdem Sancti pro audientiis publicis destinata, per me Notarium Actuarium Infrascriptum promulgata et publicata, citato, et presente admodum Excellenti D. Juris utriusque Doctore Francisco Zavagli Promotore Fidei specialiter deputato, hac die decima mensis Octobris anni 1757, Indictione quinta, sedente SS.mo D.no Nostro D. Benedicto XIV Pontifice Optimo Maximo, anno ejus Pontificatus decimo septimo, praesentibus ibidem nobili ac Reverendissimo D. Patritio Gratiani Archidiacono Ecclesiae Cathedralis Arimini, R.mo D. Paulo Lagli Canonico dictae Cathedralis Ecclesiae, nobili D. Equiti S. Stephani Pasio Antonio Belmonti de Caminatis, nobili D. Comite Ludovico de Nannis Tornimbeni, et nobili D. Capitaneo Nicolao de Vantiis, ac nobili D. Fabritio Fagnani, omnibus Ariminen. Testibus ad praemissa vocatis, habitis, specialiter, atque rogatis, super quibus etc.

Ego Jo. Baptista Ceccarelli Apostolica auctoritate Arimini Notarius publicus in Romanae Curiae Archivio descriptus, Cancellarius Capitularis, et Actuarius praesentis Causae specialiter deputatus me rogavi, et de praedictis fidem facio in forma, omni etc.

Revisa

Joseph Andreas Mariotti Sub-Promotor Fidei