DOC. 10 - CLEMENTIS <DE AUXIMO>, FRATRUM HEREMITARUM O.S.A. PRIORIS GENERALIS, LITERAE
29 maggio [1290] - Ratisbona
DOC. 10 - CLEMENTIS <DE AUXIMO>, FRATRUM HEREMITARUM O.S.A.
PRIORIS GENERALIS, LITERAE
29 maggio [1290] - Ratisbona.
Fra Clemente, priore generale degli eremiti dell'ordine di S. Agostino, ordina a fra Valentino <da Osimo>, a fra Bartolomeo <da Offagna> e a fra Romano da Fano di mettere in vendita, secondo quanto stabilito dal capitolo generale di Ratisbona, i possedimenti della loro provincia anconitana.
Copia autentica del 5 febbraio 1291, in fondo al doc. n. 12 dopo il documento n. 11 [ B]. La copia fu eseguita da 'Leonardus Ubaldi notarius auctoritate inperiali’. Francesco, vescovo di Fano, ‘certioratus de ipsius generalis prioris sigillo, benigne et grate suam interposuit auctoritatem’.
Frater Clemens, fratrum heremitarum ordinis sancti Agustini generalis prior, religiosis viris in Christo dilectis fratribus Valentino et Bartolomeo de Auximo et Romano de Fano salutem et symceram a in Domino charitatem. Fraternitatem vestram volumus non latere nuper in nostro generali capitulo Ratispone cellebrato, pro salute ordinis provida et pensata deliberatione, inter ceteras diffinitiones factas, taliter diffinitum; cuius diffinitionis tenor sic continet et revelat: “diffinimus quod ordo noster sit uniformis et quod omnia loca nostra fumdamentum habeant paupertatis; propter quod, quia ab hoc fumdamento aliqua nostra heremitoria possesiones, licet exiles, habentia videntur recedere, ordinamus atque statuimus quod possesiones ille vemditioni exponi debeant, ita quod infra trienium sint vemdite et in utilitatem ordinis sint converse; loca autem illa que de possesionibus consueverant vivere, si possunt, de elemosinis sustentari pro bono ordinis teneantur; de pecunia autem ex vemditione possesionum habenda, loca in eadem provintia capiantur et capta meliorentur, secundum quod venerabili patri nostro generali priori videbitur expedire et hoc petisse de locis propinquioribus et districtu debet intelligi, et de aliis prout idem generalis duxerit ordinandum”. Cum igitur de vestre circumspectionis prudentia et fidei puritate geramus in Domino fidutiam spetialem, vobis tenore presentium comittimus, nichilominus ad evellendam cuiuslibet sinistre suspitionis materiam vos atente requirimus, inducimus et ordinamus ac primo et secundo et tertio monemus, dantes vobis et unicuique vestrum in virtute sancte obedientie et sub interminabili anathemati districtius in mandatis, quatenus, quibuslibet remotis obstaculis ac omni fictione et fraude semotis, possesiones heremitariorum provintie vestre iuxta tenorem diffinitionis prefate, reponere ve(m)ditioni pure et fideliter debeatis; quantum vero quod inde accipi poterit, alicui nullatenus assignetis, quin idem ad omnem nostram istantiam habeatis ac fatiatis illud sine diminutione aliqua conservari. Verum si per vos vel aliquem vestrum, quod absit et non credimus fieret secus, seu quod inpedimentis daretis vel procuremini quod daretur, per vos vel personas quomodolibet submitendas, aut heedem possesiones traderentur vemdi vel quod iusto pretio non darentur vel quod pretium earumdem non integre servaretur, nos propter hoc illum vel illos qui presenti precepto cont(em)pneret obedire, contumacem et rebellem seu contumaces et rebelles ex nostre pinne trina monitione premissa in hiis scriptis excomunicationis vinculo inodamus. Si autem aliqui fratres vos ad exequendum modo aliquo inpedirent per se vel alios, publice vel private, predicte sententie volumus et decernimus subiacere. Dat(um) Ratispone in capitulo generali, IIII kalendas iunii.
