VITA BREVIS ALIQUORUM FRATRUM HEREMITARUM

(Fol. 46r) Quia dei munere cogitavi aliquorum fratrum ordinis heremitarum, qui circa ista tempora claruerunt, aliqua miracula scribere, [ea], sicut dominus ad memoriam duxerit, narrabo. Verum quia in(h)ertia meliorum me multa de memoria diluit, non eo ordine quo fuerunt pauca scribam, que hic ponere duxi, ut iuvenes fratres, qui eos in corpore non viderunt, ista licet pauca de eis audientes ad imitationem sanctorum operum incitentur.